خرافة بالك
خرافة بالك
الخرافة هذي تتحدث على راجل ماتت زوجته و خلتلو وليّد صغير
ما شاء الله الزين و العين ... يقول للشمس اضوي ول خل نضوى ... وزيد على هذا متربي
و يسمع كلام بوه ....
امشي يا زمان و ايجا
يا زمان هاك الراجل فد و قلق و حب يستحسن .... ياخي عرس بمرا جديدة ، لكن المرا
هذي كرهت الولد و غايرة منو .... و ديما تضرب فيه و تصيح عليه " يا بهيم...
يالي بيك ...يالي عليك ....يالي ما تحشمش .... أيا سيدي معيفتو في حياتو المسكين
...
المرا هذي مرت بوه طلعت
ما تجيبش الصغار زاد كرهاتو أكثر و اكثر ...لين قررت بش تتخلص منو...نهار قررت
تهجوا .... عيطتلو مدتلو صوردي ما يسوى شي و قتلو ما تروّح إلا ما تجيبلي "بالك"
، و الا الدار هذي ما عادش تعفسها ...
خرج عاد الوليد مشى للسوق من تاجر لتاجر ...
يا عمي عالسلامة نلقاش عندك بالك؟ ....هههه إلي يطردو يطردو و الي يضحك عليه يضحك
....شي حد ما عندو بالك .... زاد مسكين حار وولى يخمم أكثر ... يا ربي كيفاه نعمل
.... شنوة الحل .... و ين زعمة نلقى بالك ..... شي ...
حتى لين ضرب الليل الناس
الكل بدت تروح لديارها و التجار الي يسكر في حانوتو .... و الي مروح... فجأة يرى
بطحة كبيرة و عباد ملمومة .... و راجل يعيّط "بالك" "بالك"
..... افرح الطفل و مشالو يجري ساقيه أعلى من راسو ...حتى لين و صل للراجل يلقاه
متربّع قاعد يصيح و قدامو برشة صنادق مسكرين ....
قالو : عالسلامة عمي ، تنجم
تبيعلي بصوردي بالك؟ ... تبسم هاك الراجل ...و قلو : وليدي و انت اش حاجتك بيه
بالك ، و شكون الي بعثك؟ ...أي يا سيدي حكالو الحكاية الكل بتفاصيلها ...راو هكة
ما صار و هكة ما صار ....
بعد ما كملّوا
الحكاية عطاه صنددوق صغير و قلو : هذا "بالك" أمّا رد بالك تحلّو ...
راو كان تحلو ما يقعدش بالك في وسطو... و
ما ينجم يحلّو كان الي بعثك ...خذاه من عندو و كي وصل للدار دق الباب ....خرجتلو
مرت بوه ...و كي شافاتو تصدمت ، قلها : الحمد لله هاني لقيتلك "بالك"
.....خذت من عندو الصندوق بقوة ... و حلّتّو خرجتمنو عقرب ...يا لطيف ... و تلسعها
... و بالوقت طاحت مادتهم الأربعة....ووقتها بش فهم الطفل حكاية مرت بوهو المكيدة
الي حبت تعمل هالو....
