حكاية " إلي ما يدري يقول سبول"
حكاية " إلي ما يدري يقول سبول"
" إلي ما يدري
يقول سبول" ... مثل تونسي معروف و متداول برشا لكن برشة ما يعرفوش حكايتو...
اي يا سيدي الحكاية
تحكي على واحد من الأعيان في منطقتو ...لاباس بيه ... عندو الأرض ...عندو الورث
... عندو كل خيرات ربي...
و الراجل هذا عندو
بنية مزيانة ...و ما يحب حتى حد يقربلها ....ههه ... بالنسبة ليه ما ياخذها حد و
ما يتقربلها حد ...يحبها برشا ... و أغلى حاجة عندو بالنسبة ليه ..
يقولو ولد عمها حبها
برشا عجباتو ... و حب يخطبها ....مشى لبوها ما عطاش هالو ... و رفضو ...
عاد الطفلة هذيكا
تحب واحد يخدم في السانية تاع بوها .... و هاوكا تنجم تقابلو كان بالسرقة ....ول
تخزرلو من بعيد لبعيد ... و هو زادا كيف كيف ... نفس الشيء ...
عاد يحكيوا يقولوا
الي وقت موسم الحصاد يمشوا العايلة الكل يتعاونوا بش يلموا نعمة ربّي ...يقصّوا
القمح ... و يربطوه بحاجة ويحطوه وراهم...
الوليّد هذا و
البنيّة يحصدوا و يخزروا لبعضهم كل مرة بالسرقة ....يخزروا لبعضهم و ماشيين
للبلاصة الي فيها القمح الي لمّوه ...ماشيين بشويّة بشوية ... لين وصلوا للبلاصة
الي لموا فيها القمح ... و تقابلوا بالسرقة...
عاد ولد عم البنية
هذي فاق الي فم حاجة مش هي... لقاها فرصة... مشى لبوها حكالو الحكاية...
فد البو ... و جا
يجري و متغشش ... كشاكشو طالعة ... و مغزل على الطفل ...و طل على الكوبل ... و قال " يا ساقط يا واطي ... يا كلب
ايجا....." .... الراجل هرب .... و بو الطفلة يجري في جرتو لين وصل للقرية
(الفيلاج) ويعيط "شدوه....شدوه" ...الناس لكل جابت جرتو و شدوه خزرلهم و
قالهم " السبول ...السبول" يلقو في يديه حزمة صغيرة تاع سبول ....عاد
استغربوا الجماعة ...صار هذا علاش مفزع الناس الكل و يجري في جرتو... على خاطر السبول
...شنوة هالشر الي فيه.... ياخي سيبوه ... و هرب الراجل ....
و بو الطفلة سألهم
" علاه سيبتوه؟" .... ههه ضحكوا و قالولو " تو هذا سبب بالله بش
تشدوا على خاطرووعامل هالجوجمة هذي الكل ؟" ..... بو الطفلة قالهم " إلي
ما يدري يقول سبول..."
و الفاهم يفهم....
